Praesidens Ukraniae Petrus Poroshenko a sicariis petitus

In Ukrania, custodes publici sicarios qui praesidentem Petrum Poroshenko petebant discusserunt, partes vero rebellium qui Russiae favent, cum aeroplanum militare telis deiecissent de caelo, 49 milites interfecerunt. Societas Gazprom, quam res publica Russica tenet, copias gasium naturalium cohibuit quod nomen bis decies millies centenorum miliorum dollarum ($2 000 000 000) non solveretur. « Non de gasi agitur », inquit primus minister Ukraniae Arseniy P. Yatsenyuk, « consilium enim ceperunt delendi Ukraniam ».

Qui praesunt certamini computatrorum in Universitate Reading in Britannia autumant quoddam programma ab Russicis et Ukranensibus hominibus factum primum esse quod periculum Turing prospere fecerit, cum plus quam 30 centenas interrogantium colloquiis scriptis persuasisset se puerum 13 annos natum re vera esse.

Iudicium supremum Canadensium iudicavit non licere custodibus publicis, nisi mandato ab iudice concesso, res privatas ab eis qui aditus ad interrete praebent poscere. Youtube recusavit quin dicto regiminis Aegypti pareret, qui postulabat ut imagines moventes, quae feminam in Foro Tahrir stuprum per vim patientem exhibent, tollerentur festo ineundi magistratus praesidentis Abdel Fattah al-Sisi.

Guccifer, homo Dacoromanus peritus computatrorum furtim intrandorum qui picturas vulgavit a Georgio W. Bush depictas, poenam quattuor annorum in carcere solvebit quod cistam epistularum electronicam clarorum ducum perfoderit.

Puer decem annos natus, ab Sacramento oriundus, cusum studiorum in lyceo perfecit, et iudex iudicii superioris Californiensis rationem aetatis et tenoris magistrorum ludorum publicorum delevit.

Mater sex puerorum in carcere mortua est, dum poenam 48 horarum solvit quod multam duorum millium dollarum, quae liberorum desidiosorum causa imposita fuit, non solvisset.

Puer in Oregon quindecim annos natus sclopetum AR-15 in capsa citharae abdidit, ad scholam tulit, alium puerum sclopetans necavit, deinde se ipse interfecit. In Oklahoma, societas fabricatoria stragulae vestis quae corpus ab telis protegit, nomine ‘Bodyguard Blanket’, cuius pretium mille dollaribus constat, dixit eam mercem primis decem diebus venalibus « optime veniri ». Papa Franciscus dixit se Papamobile, quod contra tela sclopetorum munitum est, non iam usurpaturum esse : « Confitendum est, inquit, me non multum habere quod amittam ».

In Iraq contra furiosos dimicatur

Pugnatores partium Rei Publicae Islamicae Iraq et Syriae (ISIS) in Iraq secundam urbem magnitudine Mosul potiti sunt, decies 450 dollarum ($450 000 000) ab aerario furati sunt, deinde oppidum Tikrit, unde Saddam Hussein oriundus fuit, necnon alias urbes ceperunt dum ad Baghdad proficiscuntur, agris ad fines Syriae in possessione sua firmatis. Ad 500 000 incolarum ex Mosul profugerunt, pugnatores autem in interreti vulgaverunt imagines ingentis supplicii 1700 militum, ut dicunt, in provincia septentrionali Saladin. Praesidens Barack Obama dixit Americanos navem aeroplanariam ad Sinum Persicum missuros esse militesque 275 expedituros esse qui sedem legatorum et reliquos milites tueantur, et Iranenses duas turmas delectas Praesidii Revolutionarii miserunt ad pugnatores oppugnandos. « Ad potentissimos necesse est ora convertamus », inquit minister consilii regiminis Iraquiani, « Iraq ex caligine nullo tempore post Saddam emersit ». Sed Howard McKeon praeses consilii armorum gerendorum in Domo Legatorum Americanorum : « Illuc ire, inquit, opes iterum effundere in locum qui deleri videtur? At occasione data, rem evertimus. »

Quinque operarii ‘speciales’ Americani et saltem unus miles Afghanus interfecti sunt telis ab aeroplano Americano perperam delapsis in provincia meridionali Zabul.

Praesidens Syrorum Bashar al-Assad veniam sive oblivionem omnium criminum praeter scelus terroris decrevit, et nuntiavit equitem qui palmam tulerat fratremque Bassel al-Assad equorum certamine vicerat, unum et viginti annos in vinculis retentum, liberatum iri, et dicitur iusisse tela displodentia in castella ISIS demitti cum auxilio Iraquianorum. Robert S. Ford, qui legatus Americanus ad Syriam quondam fuit, flagitavit ab Americanis ut arma praestarent iis copiis qui temperantiores habentur contra regimen Assad pugnantibus. « Si dubitaverimus vel noluerimus, inquit, id nihil aliud faciet quam tempus maturare quo copiae Americanae immisceri debebunt. »

Dissensio de milite Bergdahl, Talibani et Boko Haram terrorem faciunt

Domus Alba se excusavit quod Congressum Americanum consulere omisisset de captivis in Sinu Guantanamo Talibanis pro milite Americano Bowe Bergdahl commutatis. Oppidum autem Hailey, in Idaho, festum in honorem Bergdahlis reducis omisit cum querelas et minas ei protulissent qui eum desertorem habent, saltemque tres legati Congressus Americani Pipationes, quibus de reditione eius gratulati sunt, deleverunt. « Adulescentes 20 annos nati stulte decernunt », inquit iurisperitus qui munere in Ministerio Civitatis quondam fungebatur, « Hoc non censeo dicendum esse : "si stulte decreveris, te in manu Talibanorum reliquemus" ».

Situs interretialis Talibanorum, nonnullas horas postquam imagines moventes traditionis Bergdahlis in manus Americanorum vulgaverant, defecit.

Google novum genus scriptorum occulendorum edidit quod speculationem Ministerii Nationalis Securitatis (NSA) fallat, cuiusque intestina machinatio verba habet quae picturam a NSA factam, quam Edwardus Snowden vulgavit, irrident.

CIA se Twitteri iunxit et haec sub nomine @CIA edidit : « Hanc primam Pipiationem esse nostram, neque confirmare neque negare licet ». Recensio Librorum Novi Eboraci haec respondens edidit : « Principia programmatis custodiae CIA : 1.1 In custodiam traditus et translatio 1.2 In vinculis perpetua solitudo 1.3 Alia genera male tractandi 1.3.1 Interclusio spiritus in aqua 1.3.2 Longa animi contentio 1.3.3 Verbera cervice collare retento 1.3.4 Verbera et ictus pedis 1.3.5 Custodia intra arcam ».

Decem pugnatores Talibani, qui habitum mutaverant seque custodes securitatis praebuerant, cum aeroportum Karachi adire potuerint, saltem 18 homines occiderunt. Pugnatores Boko Haram vestes militum gerentes oppidum Attagara in Nigeria intraverunt, incolas specie eos defendendi a Boko Haram in unum locum colligerunt, sclopetantesque 42 homines necaverunt.

Septem homines interfecti sunt impetibus sclopetariis in aedem iudicii in Georgia, in academiam Methodistam in Seattle, in popinam pizzariam CiCi in Las Vegas. Associatio autem Sclopetorum Nationalis (NRA) nuntium delevit a factione eius ante vulgatum quo « utique perversum » habebat quod homines, qui ius telorum aperte gerendorum reclamant, sclopeta pugnatoria in popinas Dallas et Sancti Antonii tulerant.

In Wisconsin, duae puellae 12 annos natae accusatae sunt tentasse amicam caedere quam novies decies pugione percusserunt ut sicariae fierent Hominis Tenuis, persona nullo vultu praedita de qua nonnulla legerant in situ interretiali Creepypasta ubi fabellae horrendae vulgantur. « Eam personam cogere potes tibi morem gerere, eamque facere tuam », inquit peritus fabellarum popularium Universitatis Wisconsin.

Palaestini unum regimen creant, Putin Adolpho Hitler assimilatur

Praesidens Auctoritatis Palaestinensis Mahmoud Abbas iureiurando eos obstrinxit qui ex partibus suis Fatah una cum partibus Hamas regimen suscipient, sic enim discessio anno 2007 facta, cum Hamas tractum Gazam armis occupaverit, solvetur. « Haec pagina fusca memoriae nostrae in perpetuum revoluta est neque revertetur », inquit Abbas. « Eadem res, tantum alia ora », inquit venditor quidam ciborum. Pugnatum est ad ostiola pecuniaria automatica inter ministros Auctoritatis Palaestinensis quorum 70 000, qui Gazae praefecti sunt, septem annos cessabant tamen stipendium acceperunt, et operarii Hamas qui plures septimanas pecuniam non tulerunt neque a novo regimine debitum stipendium acceperunt. Israel ut coniunctionem inter Fatah et Hamas ulcisceretur, ministerium habitationis consilium cepit dilatandi novas colonias in Hierosolyma orientali et in Ripa Occidentali ab 1500 ad 3300 domos.

Aegyptii praesidentem designaverunt 97 centesimis suffragiorum Imperatorem Abdul Fattah al-Sisi, qui novum regimen molitus erat mense Iulio superiore, Syri praesidentem refecerunt Bashar al-Assad 87 centesimis suffragiorum comitiis tantum in regionibus a regimine retentis habitis, legatis autem ab Iran, Korea Septentrionali et Russia profectis observantibus. « Quinquiens suffragium tuli, » inquit homo cum filio 12 annos nato in via ambulans, « etiam filius suffragium tulit ».

Vladimir Putin inter colloquia radiophonica respondit similitudini a Hillary Clinton factae de commeatus diplomis a Russia Ukraniensibus qui Russici habentur datis deque Adolpho Hitler ante Bellum Totius Orbis Alterum clamante ut homines nationis Germanicae in Europa orientali tuerentur : « Qui, inquit, fines nimis extendunt, id agunt non quia fortes sed quia infirmi sunt. At forsitan infirmitas non est pessimum vitium apud mulierem ». Porro Lutetiae, In Museo Cerea Grevin, femina mammis nudis effigiem Putin transfodit et fuste percussit.

Pluria milia hominum, qui genus rei publicae regium oderunt, Madrid reclamaverunt postquam rex Iohannes Carolus nuntiavit se abdicaturum filioque principi Philippo regnum traditurum. « Borbones ad squalos mittantur », clamabant.

Milites Americani ex Afghanistan reducuntur, Praepositi FIFAe corrumpuntur

Praesidens Americanorum Barack Obama intervalla temporum ostendit reducendi omnes milites ex Afghanistan, quorum ex 32 000 dispositis tantum 9800 manebunt fine anni 2014, circa 5000 fine anni 2015, denique minus quam 1000 fine anni 2016. « Sic, inquit, bella conficiuntur saeculo vicesimo primo. Afghanistan enim locus perfectus non erit. »

Eric Shinseki se abdicavit a magistratu Rerum Veteranorum cum curator generalis illius ministerii fraudem late diffusam esse in valetudinariis veteranorum retulerit confirmaveritque valetudinarium quoddam in Phoenix retulisse nomina 1700 veteranorum quibus opperiendum est in tabulam abditam, ut tarditatem curationum occuleret.

Bowe Bergdahl

Decurius Bowe Bergdahl, qui solus captivus Americanus in Afghanistan erat, remissus est turmae Americanae militum delectorum prope fines Pakistan post quinque annos captivitatis, cum pactum esset pro eo dare quinque captivos Talibanos Sinu Guantanamo retentos. Quatarenses eam pactionem permulserunt, apud quos captivi Afghani annum manere debebunt. « Quatar fidem nobis fecit captivos diligenter custoditos iri », dixit consiliaria securitatis nationalis Susan Rice.

Nonnulli renuntiaverunt unum et triginta praepositos FIFAe summam universam decies 5 dollarum ($5 000 000) cepisse a corruptore Quatarensi, pollicitosque se petitionem eorum sublevaturos esse ut Calicis Mundi anni 2022 hospites fierent, quod re evenit.

In Asia, feminae crudeliter necantur

Akhilesh Yadav

In Uttar Pradesh, in India, custodes publici tormentis aquariis plures centenas feminarum petierunt, quippe quae aedem alti ministri Akhilesh Yadav circumdederant reclamantes quod duae puellae ordinis Dalit, quae in agrum proficiscebantur ut stomachum laxarent, a quinque viribus eiusdem ordinis ac Yadav stupro violatae et interfectae esse dicuntur et ab abore penditae. Yadav autem relatoribus de puellis mortuis percontantibus : « Vos vero, inquit, in nullo periculo estis, quid ad vos? ».

In civitate Kelantan, in Malaysia, custodes publici tres homines tenuerunt qui in suspicionem venerunt fuisse inter gregem 38 hominum qui puellam 15 annos natam stupro violaverunt. In Lahore, Pakistan, custodes publici in custodiam tradiderunt quinque homines, duos autem alios adhuc indagant, qui creduntur occidisse Farzana Parveen, feminam gravidam 25 annos natam quae fustibus caesa est dum ad iudicium progreditur ut causam impugnaret quae a familia sua in maritum Muhammad Iqbal constituta est, cui sine approbatione familiae nupsit. « Uxor vel optima fuit », inquit Iqbal, qui primam uxorem interfecerat ut Parveen haberet.

Iudicium in Niger hominem damnavit qui servitutis accusatus est quod quintam uxorem occulte sumpsisset.

Plus 100 homines peregrinantes ruerunt in saepem filis acutis extructam, avidi transeundi in agrum Hispanum Mellilae in Africa boreali.

Schola Australiensis se excusavit de magistra quae alas puellae annos 14 natae rasit discipulos opera domestica demonstrante. Princeps autem ludi « Non, inquit, censemus alas semper esse radendas, sed ea facultas praebitur. »

Mahbod Moghadam, qui ministerium annotationis Rap Genius cum alio condidit, ex officio amotus est cum tales sententias evulgavisset : « UT CONIECTO : soror eius pervenusta est » et « Hoc argute et pulcherrime scriptum » de commentario Elliotis Rodger, qui scripsit se velle « omnes feminas punire ob scelus me concubitu privandi », qui porro sex homines in Isla Vista, California, caesit die 23 mensis Maii.

Maya Angelou

Scriptrix Maya Angelou, quae famam assecuta est ob commentarium anno 1969 factum Scio cur avis captiva cantet, 86 annos nata obiit in Carolina Boreali. « Amica acris, feminaque vere insignis », dixit praesidens Barack Obama. « Requiesca in pace, femina insignis » inquit Beyoncé.

Imperator Thailandensis regnum occupat, facinora cybersceleratorum

Prayuth Chan-ocha

Imperator Prayuth Chan-ocha iustitium sive legem castrensem edixit in Thailandia, vehementerque negavit se regnum affectare, tamen regnum occupavit cum duces civiles rem transigere non potuerunt post duas horas colloquiorum in castris militum in Bangkok. « Vestram vicem doleo, inquit, sed imperium ipse capiam. »

Ministerium Iustitiae Americanum quinque legatos militares Sinensium cyberexplorationis accusavit quod ordinatra societatum Americanarum penetraverint resque arcanas, quae ad commercium pertinent, furati sint. Porro custodes publici FBI dixerunt se 97 homines in 16 terris accusavisse quod programmate BlackShades usi sint, vel id programma vulgaverint, quod facultatem cameram alterius ordinatri occupandi dat. Etenim rector custodum FBI James Comey eis qui colloquio a consociatione White Collar Crime Institute Manhattani facto adfuerunt dixit fortasse regulam suam durissimam, quae ullum hominem qui marihuana usus sit conducere vetat, allevandam esse. « Fortes homines conducendi sunt, si istos cybersceleratos vincere velim, inquit Comey, sed nonnulli herbam fumare in ipsa via volunt dum ad colloquium nostri properant. »

Ministerium Rerum Veteranorum Americanorum dixit se investigationem de tabulis corruptis deque mora in hominibus curandis, quae mortem aegrotantium efficere poterant, in 26 alias sedes rerum veteranorum prolaturum esse.

Museum Memoriale 11 Septembris patefactum est, nonnullis autem necessariis eorum qui mortui sunt vituperantibus propter tabernam in ipso museo quae tales nugas venditat : vestimenta canum Siphonariorum et inaures ex arboribus quae superstites fuerunt impetibus 9/11.

Adulescens virgineus feminas caedit, partes dextrissimae comitiis Europeanis procedunt

Elliot Rodger

Elliot Rodger, filius 22 annos natus directoris minoris pelliculae « Ludi Inediae », tres conturbernales in vico Islae Vistae, prope Universitatem Californiensem Sanctae Barbarae, pugione occidisse dicitur, deinde autocineto BMW ad vicum studentium ivisse, homines pedibus ambulantes percussisse, ex fenestra sedis vectoriae sclopeto semi-automatico tela iaculasse, sic duas feminas quae domum sororitatis adstabant virumque in taberna interfecisse et 13 alios homines ante vulneravisse quam se ipse sclopetavit. Pridie imagines moventes apud Youtube vulgaverat quae inscribuntur « Retributio Elliotis Rodger » quibus consilia sua impetum faciendi palam fecit, dixitque se stomachari quod pulchrae feminae cum eo non concubuissent, virgineusque maneret. Parentes eius abhinc nonnullas septimanas custodes publicos appellasse dicuntur, sed hi cum ad salutem recognoscendam venissent, eum « urbanum » et « benignum » habuerunt. « Si cubiculum perscrutari poposcissent, » in commentario 137 paginarum scripsit, « tunc omnia dirempta essent ».

Petrus Poroshenkus

Ukranienses prima comitia praesidentalia habuerunt post Victorem Yanukovych exactum mense Februario, Petrusque Poroshenkus, praedives dulciorum saccharo conditorum mercator, praesidens suffragiis 54 centesimarum factus est. « Is, inquit quidam suffragens, nobis proponit vitam delicatam Europeanis aequalem. Speramus eum nos in Europam laturum esse. »

Partes dextrissimae nationibus suis studiosae partesque « Euroskepticae » quae Unionem Europeanam imminuere volunt victorias haud spernendas consecutae sunt in comitiis parlementariis Unionis Europeanae. Frons enim Nationalis 26 centesimas suffragiorum Francogallorum tulisse creditur, partesque Independentiae 28 centesimas suffragiorum Britannorum, partes neo-nazistae Aurora Aurea 9 centesimas suffragiorum Graecorum tulerunt. « Terrae motus est », inquit primus minister Francogallorum Manuel Valls. Porro autem Suetia unam legatam partium Feministarum, Batavia unum legatum partium Animalium delegerunt.

Feminae quae nuntios edunt, conubium hominum eiusdem sexus

Barbata Walters

Nathalie Nougayrède, prima femina quae moderatrix suprema ephemeridis Le Monde facta est, se munere abdicare coacta est cum septem summi moderatores munera deposuerint quod Nougayrède consilium renovandi editiones impressas digitalesque cepisset, et Jill Abramson, prima femina moderatrix ephemeridis New York Times ex officio amota est « plures ob causas, » ut dixit rector Arthur Sulzberger Jr., « inter quas quod nonnullas res ex libidine decreverat ». Barbara Walters, quae anno 1976 prima femina fuit quae nuntios cotidianos per stationes televisificas Americanorum annuntiaret, rudem accepit, et dum ultimam emissionem nomine Aspectus (The View) narrat, Hilary Clinton, Oprah Winfrey et 25 aliae diurnariae televisificae adfuerunt. « Hae (de diurnariis inquit) sunt quas vobis legavi. Potius quam vale, dicam ‘À bientôt’ ».

Dakota Septentrionalis appelavit a iudice qui legem rescidit abortum prohibentem ex primo pulsu cordis infantis in matris utero. Iudicia altiora in Arkansas et Idaho iudicia inferiora adprobaverunt quae prohibitiones nubendi hominem eiusdem sexus sustulerant, sed dilatationem interposuerunt; iudiciumque supremum Utahensis dilatationem pluribus iudiciis inferioribus interposuit quae iubent ministerium valetudinis illius civitatis scriptum natale iis infantibus tribuere qui a hominibus eiusdem sexus adopti sunt inter spatium 17 dierum, ab eo tempore quo iudicium mense Decembri prohibitionem nubendi hominem eiusdem sexus sustulerat usque ad diem quo Iudicium Supremum Americanum dilatationem interposuit. Legatus accusatorum publicorum « dilatatio, inquit, rerum obscuritatem tollit ».

Iudices in Khartoum feminam gravidam adulterii damnaverunt iusseruntque centies flagellari, deinde apostasiae damnaverunt et necari laqueo suspensam iusserunt quod maritum, qui Christianus est, relinquere noluit, at poenae moram adtulerunt dum parturiat.

16 000 iugera prope Sanctum Didacum in California arserunt ter duodecim incendiis agrestibus, quae venti temporis anni ieuntis ventilabant, quos Sanctae Annae sive ventos diaboli vocant. « Aliquid apocalypicum monebat », inquit Gay Walker, incola Sancti Marci.

Fossores in Turcia interfecti, naves Sinensium turbas irritant



Socius primi ministri Ergodan hominem calce petit

In Turcia, incendium in carbonum fodina prope oppidum Soma in regione Aegea fossores 301 interclusit et interfecit. Quinque collegia opificum intermissionem operum suaserunt, ut regimen interpellarent quod incolumitas opificum in peius mutata sit postquam fodinae publicae abhinc decem annos privatae factae sunt. Primus minister Recep Tayyip Ergodan orationem habuit ad necessarios fossorum mortuorum vel vulneratorum, casusque qui in fodinis accidere solent « res ordinarias » esse dixit, talesque casus apud alias nationes dinumeravit ab Britannis aetate Victoriana. Quattuor administratores societatis fodinariae cabonum Somanae in custodiam traditi sunt. Adiutor autem primi ministri hominem reclamitantem in solo a custodibus retentum pede icit, deinde Ergodan alicui reclamitanti minatus est, quod in pellicula visivica videre libet. « Quod accidit, inquit, accidit. Primum ministrum rei publicae si sibilaveris, alapa vapulabis. »

Narendra Modi

In India, millies 500 millia hominum comitia parlementaria habuerunt, quae nationis Hinduistae studiosis partibus Bharatiya Janata primoque ministro Narendrae Modi imperium dederunt, decem post annos quam Congressus Nationalis Indus regimen susceperat.

In Vietnam, turbae hominum iratorum ob classem Sinensium conductam ad turrim quae abhinc tres septimanas tracta erat in vicinitatem Insularum Paracel, de quibus est lis inter Vietnam et Sinam, officinas externas incenderunt et spoliaverunt, non solum Sinensium sed etiam Coreaneorum Meridionalium et Taiwanensium. « Quaecumque litteras Sinenses habebant, eas turbae adortae sunt », dixit curator officinae Singaporeanae.

Ditissimus Ukraniensium Rinat Akhmetov, qui mercaturas carbonum et ferri facit, declaravit se censere expedire ut regio orientalis, ubi 300 000 homines conductos habet, Ukraniae coniuncta maneat. Postquam hoc declaravit, opifices ferri vigilias in quinque urbibus orientalibus agere coeperunt, inter quas est portus ferri Mariupolis, ubi aedes publicas purgaverunt a fautoribus illius Rei Publicae Donetsk desciscere volentibus. « Omnibus licet suam sententiam tenere, » inquit rector molae ferreae, « at non in loco ubi operandum est. »

Mores mutantur, imaginesque puellarum a Boko Haram raptarum

Cum praetor illud interdictum tulerit quod senatus Arkansensis nuptiis hominum eiusdem sexu interposuerat, Iennifer Rambo et Kristin Seaton prima par factae sunt hominum eiusdem sexus quae in hac civitate licentiam nubendi acceperunt, in urbe Eureka Springs. Praefecta autem vicaria fores aedis publicae claudente antequam litterae poscerentur quae facultatem nubendi praeberent, senex quidam 80 annos natus nomine Paulus Wank baculo gestiebat, « plurimos, inquit, annos genus nostrum odisti, noli cessare ».

Societas Nintendo veniam petiit quod versionem Anglicam ludi Iaponici fecisset cuius cum ratio est vitam hominum simulare, tum vero coniunctiones hominum eiusdem sexus non praestat.

Tom Neuwirth

Tom Neuwirth, vir Austricus qui vestimentis muliebribus indutus barbam gerit, certaminis cantatorum Eurovisionis palmam tulit.

Turma Arietum Sancti Ludovici athletam Michaelem Sam elegerunt 249ma electione delectus NFL anno 2014, itaque factus est primus athleta pedifollis Americani mercatorii qui aperte fatetur se masculorum libidinosum esse. Telephonice de hac re certior factus, Sam prae gaudio in amplexu amatoris flevit, eum osculatus est, orem placenta illevit. « Athletam peritum pedifollis elegimus », inquit lanista Arietum Jeff Fisher.

Pueri adulescentes qui discipuli sunt in schola in Newport Beach, California, puellarum electionem fecisse dicuntur, quae in congressu finis cursus studiorum eos comitarentur, nonnullasque electiones inter eos commutavisse. « Multae quidem puellae electionem observant puerosque qui eas eligerunt comitantur, » inquit discipulus quidam.

In pellicula visifica circa 130 puellas ex 276 puellis a schola in Nigeria raptis aspicere licet, ducemque factionis Boko Haram praetendentem has puellas, quae hijab in capite gerebant precesque Arabice narrabant, Muhammetanas factas esse, ceterasque quae huic religioni non adscivissent se liberaturum in vicem si sodales Boko Haram in custodiam traditi liberati fuerint. De his autem quae religiosae factae sunt: « quae, inquit, vos sollicitos habent, eas profecto liberavimus. »

Calor mundi augescet, populi scita in Ukrania

Duae turmae climatologistarum Americanorum investigationes vulgaverunt quae tegimen glaciale in Antarctica corruere coepisse confirmant. Programma Americanum Investigationis Mutationum Caeli aestimationem tempestatis annuam extulit, quae calorem caeli auxisse inter 0.7 et 1.0 gradus celsianos ab 100 annis patefacit, auguraturque proximis 100 annis maiorem calorem fieri posse usque 5 gradus si homines nihil melius egerint, caeli autem tempestates, quae inundationes sive siccitatem faciunt, ab ipsis hominibus effici. Quo maiorem famam huic indagationi daret, Praesidens Barack Obama inter colloquia antea facta apparuit quae in nuntiis de temptestate televisificis adhibenda sunt. « Maximi momenti est fidelem tabellarium habere, » inquit Iennifer Palmieri, rector communicationis Domus Albae, « atqui nemo meteorologis consilium arcanum esse credit. »

In Syria praesidens Bashar Al-Assad magistratum iterum petire coepit, rebelles vero partes coeperunt copias suas a Holmes reducere, quae urbs « caput rerum novarum » nominatur cum primas partes seditionis adversus Assad egerit.

Navis vigil Vietnamensis et plures naves Sinensium tormentis aquariis inter se pugnaverunt prope turrim petroliariam primo mense a Sinensibus tractam ad Insulas Paracelenses, de quibus lis inter eos est, in meridionali parte Maris Sinensis.

Pugnatores qui Russiae favent provincias orientales Donetsk et Luhansk desciscisse denuntiaverunt post populi scitum in quo suffragia in nonnullis urbibus recondita sunt in arcis perlucidis, et picturae in Krasnoarmiysk suaserunt Ukraniensibus ut desciscerent necnon « rem Iudaicam Europeanam » averterent, conciliumque comitiale a pugnatoribus factum in Donetsk renuntiavit 89 centesimas suffragentium asciscivisse.

Praesidens Russicus Vladimir Putin nunc demum Crimeam adivit ab eo tempore quo adiuncta est, legemque tulit quae impias voces proferre in spectaculis vetat. « Apud nobiles hoc solet fieri ut verba sordida proferantur, » inquit philosophus Russicus Vadim Rudev.

Lapsus terrae in Afghanistan, sceleratus rude necatur in Oklahoma

In Nigeria, duae ex 300 puellis quae raptae sunt a schola in septentrionalibus partibus abhinc tres septimanas, morsu serpentium obivisse dicuntur. Dux autem factionis Boko Haram ceteras ut mancipia venumdare in animo se habere dixit.

Rectores Afghani situm duorum lapsuum terrae in provincia septentrionali et orientali Badakhsan sepulcrum ingens nominaverunt, nam 2000 homines adhuc desideratos indagare omiserunt, inter quos constant 600 incolae proximi vici qui, dum superstites quaerunt, altero lapsu sepulti sunt.

Clayton Lockett

Praesidens Americanorum Barack Obama de poena capitis deliberandum esse censet, homine capitis damnato Oklahomensi Clayton Lockett rude necato cordis defectione post 38 minutas, nova admixtione medicaminum letalium adhuc inexperta in venam inguinis inecta, quod venam ita strixit ut parum medicaminis quam ut statim moreretur inveheret. Sceleratus Lockett, qui mulieres stupro violaverat capitisque damnatus est quod feminam 19 annos natam manuballista vulnerasset deinde socios eam vivam sepelientes spectasset, cum sopitus dicebatur tum vero gemuit, caput sustulit, dixitque « mehercule ».

Praecones publici Coreae Septentrionalis commentarium vulgaverunt quo Civitates Unitas vituperarent ut « pessimum omnium orbis terrarum corruptorem iurium humanorum » et « malam crucem » et « solitudinem maxime semotam a iure vivendi ».

Discordia in Ukrania, candelabrum humanum cadens, ursulus mordens

Administratores translativi Ukraniae bellum indixerunt hominibus circa 800 ad Russiam desciscere molientibus in urbe Slovyansk, una ex duodecim urbibus ubi homines armati aedes regiminis occupaverunt. Quadraginta sex homines mortui sunt Odessae in pugna inter partes qui Kievi parent et eas qui Moscuae favent. Qui autem Russiae favent stationem custodum publicorum ceperunt et 67 captivos a carcere liberaverunt. Secretarium Civitatis Americanorum Iohannis Kerry a Russicis flagitavit ut res artas laxarent, alioqui poenas oeconomicas maiores daturi essent quae rei nummariae et mercaturae gasium detrimentum adferrent. Dmitry Peskov, orator Kremlinis, autumat Russiam « suam gratiam amisisse » apud desciscentes. « Iterum terroris administratoribus in Kieve instamus ut milites deducant, tandemque in iustis colloquiis de condicionibus tractent », legitur in denuntiatione a ministerio rerum externarum Russiae. « Colloquia modo incepta erant, » inquit primus Ukraniae minister Yatsenyuk, « cum interrupta sunt a crepitu sclopetorum Kalashnikovorum a Russicis factorum. » Moscuae in Platea Rubra pedites insignia gerebant in quibus legebatur : « Ferias in Crimea degamus », hoc quidem in primo decursu Diei Maii ab exitu Unionis Sovieticae.

Inter spectaculum Fratrum Ringling et Barnum & Bailey in Providentia, Rhode Island, octo feminae, quae capillis pendebantur a « candelabro humano » metallo facto, plures triginta pedes in humum ceciderunt vinculo rupto. « Numquid sic cadunt consulto? », auditur homo rogans in pellicula cladis apud YouTube.

Ecologista Americanus imaginem vulgavit papilionis Dryas Iulia et apis singularis lacrimas caimanis crocodili conspiciliati bibentium.

Administratio conservationis Misouriensis consilium suum avertit necandi Boo Boo, ursulum in horto animalium palpandorum in Moscow Mills qui 18 studentes universitati studiorum momordit in festo quod Animalia Palpanda in Palude vocatur.

Magistra ludorum quae saltat in gremio, sicarius qui litteras CAEDES in cervice gerit

Lupita Nyong'o

Commentarium periodicum People histrionem fabulae « XII annos servus » Lupitam Nyong’o pulcherrimam omnium hominum nominavit et concilium Dies Patrum – Dies Matrum gubernatorem New Jersey Christophorum Christie « patrem huius anni » decrevit. Pueri autem eius « cum primum, inquit, certiores facti sunt de hoc titulo, riserunt. »

Magistra puerorum in iudicium postulata est quod die natali cuiusdam discipuli 15 annos nati genus saltationis immundum, quod « saltatio in gremio » vocatur, adulescenti fecit.

Russia quattor magistros linguae Anglicae extra fines suos amandavit quod « mores Americanorum vulgassent ».

Administratores Sri Lanka viatrici Britannae hospitium gratuitum praebuerunt, cum in custodiam tradita fuisset Colombi quod figuram Buddhae in cute pictam haberet, et praetor Kansensis homini qui vocabulum « CAEDES » in cervice scriptum habet vestem quae cervicem absconderet gerere sinivit dum in subselliis apud iudices apparet reus caedis.

Cohors delecta plurium 60 custodum publicorum cum helicopteris domum in Long Beach, Novi Eboraci, circumdederunt cum homo quidam, ludo interretiali Call of Duty modo victus, custodes publicos sub nomine victoris telephonice appelasset dixissetque se matrem occidisse.

In aede iudiciorum Salt Lake City custos foederalis reum in iudicio latronicii sclopetavit necavitque cum impetum fecisset in testem eum incusantem.

Nonnulli homines imagines feritatis custodum publicorum apud Twitter vulgaverunt cum Praefectura custodum publicorum Novi Eboraci eos hortata esset ut imagines ipsorum cum custodibus publicis vulgarent apud Twitter sub signo #myNYPD.

Pueri qui festum Paschale celebrabant in Richmond, Virginia, ova litteris farta odium in alios quam albos homines suadentibus colligerunt.

Palestinenses, Salafistae, celeritas interretis

Israel colloquia cum Auctoritate Palestinensi de pace facienda interrupit quod partes Fatah Praesidentis Mahmud Abbas et partes Hamas regimen commune Palestinensium suscipere una decreverunt.

Ad septentriones Libyae, cohors pugnantium Salafistarum, quorum dux socius Ossamae bin Laden fuit, castra Americanorum, ubi milites exercitabantur ad eos comprimendos qui terrorem adhibent, expugnasse dicuntur.

Brunenses novas poenas legis Muhammatanorum, ut lapidatio adulterorum et secatio corporis membrorum, in tempus distulerunt.

Praetor Aegyptius capitis damnavit ducem Fratriae Muhammatanorum Muhammed Badie necnon 682 fautores eius.

Crux occidens occidit

Dum festa aguntur antequam Ioannes XXIII et Ioannes Paulus II canonizarentur, homo Italus ruina crucis proceritate 98 pedibus oppressus est.

Iudices Oklahomaneses moram, quae capitis supplicio duorum hominum facta erat, submoverunt, quia damnati certiores facti essent de genere et copia medicaminis quo necandi sunt.

Obtrectatores negant propositum Commissionis telecommunicationis Americanae (FCC), quo licebit mercatoribus qui aditum ad interrete praebent pluris accipere ab societatibus qui celerius adire velint, normae neutri parti favendae parere, quae docet celeritatem eandem adhibendam esse omnibus, nulla quidem ratione personae habita. Erik Klinker, administrator societatis commercii scaporum Bittorrent, « Viam, inquit, celeriorem praebere ditioribus ipsi nomini discriminationis congruit ».

Ministerium Iustitiae Americanorum ab Iudicio Supremo flagitat ut relatorem ephemeridis New York Times provocantem deiiciat, cui imperatum erat testimonium dicere de indicibus adhibitis in commentario de speculatoribus Americanis CIA nitentibus nocere rebus nuclearibus Iraniae. Interea Ministerium Civitatis consilium annuum incepit quo liberior fiat licentia scribendi.

 

Vestigia pueri iam visibilia sunt

Alienigena 15 annos natus, qui Sanctae Clarae in California habitat, in puteo rotarum absconsus aeroplani Boeing 767, cum ad matrem revertere vellet, ad terram salvus descendit in Maui.

Naufragium navis Sewol

Navis traiectoria nomine Sewol, cum 476 homines a Seoul ad insulam balneariam Coreae Meridionalis vehebat, naufragium fecit, saltem 86 hominibus occisis et saltem 220 absentibus. Gubernator in custodiam traditus est quia constabat eum non iusisse navem statim desereri sed tantum 30 minutas ab eo tempore quo navis inclinare coepit, multis quidem vectoribus iam inclusis in navis penetralibus. Praesidens Park Geum-hye « homini, inquit, cruentissime agenti ignosci non potest ».

Duo fratres Pakistani, iamdudum condemnati quod quinque cadavera detexissent, in custodiam traditi sunt quia caput infantis in domo eorum inventum est. Femina quoque in Pleasant Grove, Utah, confessa est se in arcis posuisse cadavera septem suorum infantium in receptaculo autocinetario suo, spiritumque interclusisse sex eorum.

Iraq carcerem Abu Ghraib clausit quod metueret ne rebellium partes eam obsiderent.

Praefectura custodum publicorum Novi Eboraci turmam dissolvit suam quae Muhammetanos post 11 septembris 2001 speculabatur ad locos notandos ubi deo cultum adhiberent, ubi laborarent, quas tabernas adirent.

Museum Magnorum Hominum Sinense fassus est se Coreanis septentrionalibus obtemperavisse qui proceritatem statuae Magni Ducis mortui Kim Il-Sung sex digitis altiorem reddere flagitaverunt, et legati Coreani Londonii procuratoribus Britannicis instabant ut cogerent tabernam concinatoris capillorum tollere picturam quae capillos Supremis Ducis Kim Jong-Un derideret. Capillatoris autem filius « istud, inquit, genus comptûs fere nemini placere videtur ».

Boko Haram, Ukrania, Edward Snowden

In Nigeria, factio rebellis Boko Haram professus est impetum explosivum suo numine factum esse in statione autoraedaria prope urbem Abujam, viginti hominibus mortuis et regulo quodam interfecto. Praeterea saltem 230 puellas rapuerunt in provincia septentrionali Borno. Ministerium defensionis Nigerianum omnes puellas praeter octo, pro quibus timebatur ne coquae sive servae veneriae fierent, salvas redisse nuntiavit, quod autem postea negavit. Praesidens Ionathan Goodluck « res, inquit, Bokaniana in tempus resolvetur ». At dux rebellium Abubekar Shekau in imaginibus televisificis ad Ionathan missis « Hic, inquit, est quintus ipse annus ab eo tempore ubi iactasti te nos victurum esse ».

Russia, Ukrania, Unio Europea, Civitates Foederatae decreverunt Genavae ut armati qui Russiae favent ex oppidis Ukraniae orientalibus discederent. Dux custodum publicorum in oppido Horlivka appetitus est et in valetudinario iacet cum hominem de pariete viginti pedum alto deiecisset qui conabatur vexillum Russiae in locum vexilli Ukraniae sufficere. In urbe Stovyansk, homines armati « virides », quorum unum Ukrania probavit emissarium Russiae esse, stationem custodum publicorum adorti sunt. Armati incolis confirmaverunt praefectam eorum, quae erepta est, valere. « Satis valet, » dixit quidam homo, qui ipse se « Praefectum Populi » nominabat, « tamen heri discrimen parvum subiit. Valetudinem curat post chirurgiam et iam dolet. »

Aeroplanum bellicum Russicum navem Americanam USS Donald Cook in Ponto Euxino duodeciens haud alte supervolavit. Praesidens Russiae Vladimir Putin vocem taenia magnetica servatam vulgavit Edwardi Snowden, qui manceps fuit societatis Americanae NSA, percontantis in consilio municipii per rete televisivicum publicum transmisso, an Russia ullo modo auscultaret, conservaret, dispiceret colloquia plurium millies millium hominum, cui respondet Putin : « nostra autem societas speculatoria, Deo gratias, diligentissime populo et legi subservit. »